ING MANUC NANG PEDRO
by ERNIE TURLA
Malutu ya palung ing manuc nang Pedro
Anti ya mong helmet masias a sumbrero
Buangis ya queng camua mabagsic ya tiru
Texas yang matapang pa quesa queng toru!
Queng bisyu ning cayang sugarul a amu
Queng apis, masahi, mesese yang ustu
Bayu ya mibulus mipractis ya pamu
Qng sucal Angeles caretang labuyu.
Niang prumeru neng lon ing cayang calaban
Agad neng detangan ning guiam queng bacbacan
Layun neng lepitan para atingiran
At caibat canita na ne segudsuran.
Ala neng sicasu queng pali na buntuc
Masias yang sagupa, lisic yang maniapuc
Sucdu-sucdu ya queng cayang pamanyigpo
Neng yatang llamado ya nang yang magbabo.
Ari ya mo wari caniting penandit
E me ayaguanta e bisang paigpit
Maticdi ya bicas, caya ngan ing mandu
Tatapang yang lacuas queng balang segundu!
Bulbul nang quiquintab magalsa qng tundun
Tanda ning sabic na queng pamaquisabung
Atras-abante ya queng pamamalabat
Catawan ning metung lalasa ya balat!
Queng lacas na't dagul e bisang cucurul
Alang patugut ing cayang pamaniapul
Masican yang dascul, dumali't mamomba
Aguiang durucal ne rungus queng lilyu na!
Anti yang ubingan sicsac queng camandag
Ustung tuctucan ne dacal ing mabalag
Agad talab iti queng cayang abihag
Manasaquit yang tal lumbag niang banayad.
Ing taring gaganu nang misna qng taram
Lalsut yang malalam neng tutud yang laman
At nung qng ebun ne iti atamacnan
Magus ya calaru't matda panimanman!
Caraniwan mu iti queng bie sabungero
Bista ma't masambut e luncut y Pedro
Tatio agad ya ring myuman macasali
Para pamalipi o pagpintacasi!
*Kapampangan is one of the 8 major Philippine languages which include Tagalog, Ilocano, Bicol,
Cebuano, Hiligaynon, Waray and Pangasinan.
KAPAMPANGAN, MIPACDE CA!
an anthem by Ernie Turla
Kapampangan, mipacde ca!
Probincia cang capuri-puri queng bansa.
Ing lugal mung quequeng tibuan
Masaplala ya queng atbu at palayan.
Cabalitan ya-ing bunduc mu
Nung nu sasalingal ing quecang banglu
Carin ya sinlag a leguan
Ing meguing leyenda mung Mariang Sinucuan.
Kapampangan, mipacde ca!
Luid la reng pipumpunan ming menimuna.
Uling cibilisadu la
Queng patag at e queng bunduc la sinalta.
Suguing Principe Balagtas
Miglacbe ya, queng pampang mu ya miparas
Tinasac ne ing tandus na
At sicluan ne ing gabun mu queng lagyu na.
Kapampangan, mipacde ca!
E ne matda ing sulu mu queng historia
Parti naca ning cayarian
Nang cagalang-galang a Raha Soliman.
Ninu wari queng Menila
Sinacoru 'niang luban de ring Castila
Nune reng que Macabebe
Sinabac nang Bambalito ing cayang bie.
Kapampangan, mipacde ca!
E ne lumbug ing batwin mu cabang-caba
Panday Pira, palipi me
At y Francisco Maniago a rebelde.
Icang queng Morus mengaya
"Queng leon o tigre," ngamung migsalita,
E cu tatacut queca pa?"
Macanian cang meguing taniag caring malda.
Kapampangan, mipacde ca!
Panatag naca cabilian queng historia
Icang poder ning Espana
Qng uli mu reng barangay mitipun la.
Icang mequilaban Morus
Ica ing migdependi queng Intramuros
Qng uli mu-ing labuad tamu
Misampulung ya at meguing metung nia mu
Kapampangan, mipacde ca!
Queng dagat deng Dutch at Insic simbut mula
Nia dengal de-y Lacsamana
At nia magpiesta tang "naval" balang banua.
Iniang mecua ya-ing Menila
Careng British, ing capital milipat ya
Qng Baculud, Kapampangan
Anac mung Manalastas yang mequilaban.
Deng Castilang memahala
Pinuri raca tapang quetang ari ra
Uli mu migtagumpe la
Dapot niang migdimitir ca mibagsac la.
Kapampangan, mipacde ca!
Pagmaragul mi ing ambag mu queng bansa
Abe racang menimuna
Reng migrebolucion laban qng Espana.
Atyu nacang macamarca
Careng aslag ning aldo na ning bandera
Atyu naca queng memoria
Inimpluencian me cursu ing historia
Kapampangan, mipacde ca!
Macaruquit naca lagyu queng historia
Queng "Death March" mequi-marcha ca
Deng Hucbu mu careng Hapon linaban la.
Atin nacang presidenti
Chief Justice, heneral, martir at bayani
Cardinal mu yang prumeru
Sale raca reng dacal a pensionadu.
Mipacde ca, Kapampangan!
Ica-ing estrella ning bansang cabilugan
Lon ta namu neng magpascu
Ala lang capara tindag deng parul mu.
Anti murin neng maleldo
Queng pamagmasusi queng lasa ning Guino
Deng queng curus papapacu
Dadaiwan dong alben mabilug a yatu.
Kapampangan, mipacde ca!
Balicdan mo reng anac mung sasagupa
Magbiba lang alang patna
Maniampucaque la puri't lugud queca.
Indung balen, sabian mu sa
Macasadia cami at layun magcusa
Mie anti queng quecang nasa
Paquipatlalu raca honor queng bansa.
Chorus: (sung after every 2 stanzas)
Magluid ca't magwagui!
Marangal ca lahi!
PHILIPPINE NATIONAL ANTHEM
translated into Kapampangan
by Ernie Turla
Isla ning abac, Perlas na ning aslagan
Lugud mi queca, Daya mi cacawal
Balen ming tibuan, Pugad daring bayani
E re alusub, Ing nuan mung lugal!
Queng asul mung banua, dagat, bunduc
Bubyung ing taguimpan
Acaquit ming saslag queng biga
Ing gloria ning calayahan
Deng batwin at aldo ning quecang bandera atmo sala
Tanda no ning diwa at tagumpe at deti e la matda
Malagung labuad a quecaming palsintan
Queng candungan mu caligayan
Nia patia sinupil daca o linocu
Subu mi-ing bie mi qng uli mu.
BA, KAPAMPANGAN CU YATA!
Music: E. Sarmiento Lyrics: Ernie Turla
Refrain: Ba, Kapampangan cu yata!
Maguing queng leguan!
Maguing queng timan!
Ba, Kapampangan cu yata!
Masqui queng nanu man paita!
1.'Nia pagmaragul cu
Ing Kapampangan cu
E cu ipamalit ing pangatau cu
Aguiang nu man carin
Kapampangan cu rin
Titibuc na iti
Ning pusu cu!
2. Talacad taya ing
Quecatang bandera
Itang Kapampangan
Queti America
Gulait tamu ngan
Bar'catang damdaman
Paquit ta ing atin
Tang aguman!
3. Maglapo queng casna
Ing quening pusu cu
Tutu cung pangaya
Lahing amana cu
Mayabang nacu pa
Nung pamayani cu
Careng sabla ing Ka-
Pampangan cu!
4. Queng sabi at dapat
Paglualu cong tapat
Ing balen cung tibuan
At amanung sisuan.
Nung ating cucutang
Queng cacung ibatan
Alistu cung sabian
Kapampangan!
5. Pagmasabal que ing
Balen cung ibatan
Paquipate que-iti
Masqui caninu man
Nanu nia ing tatac
Dareng Kapampangan
"Queng leon o tigre"
Yang casebian!
6. Magcainge tamu ngan
Bilang celebracion
Itang Kapampangan
Taniag queng tepangan
E ta ya paburen
Mibagsac ing balen
Pagdependi taya
Caninu man!
7. Bilang taguimpan na
Ning quecatang balen
Magprisigui tamung
Mitbit queng dangal an
Uling ya ing diwa
Na niting aguman
A tinatag da ring
Kapampangan!
8. Pampangueno cung tal
Duquit quilub at lual
Pagmayring cu iti
Palipi cung nobli
Nung e mu pin sanang
Macarine sabian
Itang Kapampangan
Ding "number one"!
